බොඳ වෙන සරසවි සිහින...

                        Image :-fos.cmb.ac.lk

දිනෙන් දින සිහින පොදි බැඳ ගනිමින් සරසවි සිහිනය සැබෑ කර ගැනීමේ කුළුඳුල් ප්‍රාර්ථනය සිත් තබා ගෙන කොතරම් පිරිසක් තම අධ්‍යාපනික පවුර ගොඩනඟන්නට ඇති ද? දෙමාපියන්ගේ යටතේ යැපෙමින් පාසල් මෙන් ම උපකාර පන්ති සඳහා වියදම් දරමින් අසහාය කැප කිරීමකින් ඔබ ද වෙහෙසෙන්නට ඇති.

දහසකුත් වූ පොත් පාඩම් කරමින් ,දහසකුත් කරුණු මතකයේ රඳවා ගනිමින්, දහසකුත් වූ විභාග වලට සහභාගී වෙමින් දිවා රෑ වෙහෙසෙන්නට ඇති.නමුදු කොතරම් කැප කිරීම් කරමින් මහන්සි වී අවසාන කඩ ඉමට පැමිණිය ද ඔබ අතරින් සරසවි සිහිනයේ සැබෑව දකිනුයේ අතළොස්සක් පමණි.වර්තමාන අධ්‍යාපන ක්‍රමය ගොඩනැගී ඇත්තේ එලෙස ය.මෙයට වග කිව යුත්තේ ඔබ නොව වර්තමාන අධ්‍යාපන යථාර්ථය යි.

දක්ෂයින්ගෙත් අති දක්ෂයින් තෝරන මේ අධ්‍යාපනික තත්ත්වය තුළ සරසවි වරම් නොලැබූ පිරිස අදක්ෂයින් නොවේ. ලකුණු එක හෝ දෙකට සරසවි වරම් අහිමිවන කෲර සමාජයක අධ්‍යාපනය ලැබීමට සිදු වීමයි එයට හෙතුව.කුඩා අතපසු වීමකට ඔබගේ ඒ සිහිනය බොඳ කර දැමිය හැකි තත්ත්වයට වර්තමාන අධ්‍යාපනය සකස් වී තිබීම අප සැමගේ අභාග්‍යයකි.කොතරම් ඉහළ ලකුණු ලබා ගත්ත ද විශ්ව විද්‍යාලවල පවතින සීමිත ඉඩ ප්‍රමාණයට පමණක් සිසුන් බඳවා ගැනීම නිසා කොපමණ සිසු පිරිසක අධ්‍යාපනය අතරමඟ නවතින්නේද? එනිසා දෙමාපියන්ගේත්, ඔබගේත් ඒ මහන්සිය අපතේ ගියාදැයි සිතමින් මානසික ව ඇද වැටෙන සිසු පිරිසට මේ යථාර්ථය තේරුම් කර දිය යුතු ය.

එ නිසා එම අධ්‍යාපනික ගැටලුවලට විසඳුම් සෙවිය යුතු ම ය. මේ සඳහා යෝජනා ඉදිරිපත් කරමින් අදාළ බලධාරීන්ගේ අවධානය ඒ කෙරෙහි රැඳවීම අප සැමගේ වගකීමක් වනු ඇත. තව තවත් විශ්ව විද්‍යාල ගොඩනංවමින් හෝ එම දරු පිරිසගේ උසස් අධ්‍යාපන ගමන් මඟ සකසා දිය යුතු ය. ඒ වගේ ම විශ්ව විද්‍යාලවලට ඇතුළත් කරග්න්නා පිරිස තවත් ඉහළ දැමිය යුතු ය. නමුත් වර්තමානයේ නම් දැකිය හැකි වනනේ ක්‍රම ක්‍රමයෙන් විශ්ව විද්‍යාලවලට බඳවා ගන්නා පිරිස අඩු කරන බවක් ය. සුවිසල් තරඟකාරී විභාගයකට මුහුණ දී ඉහළ සාමාර්ථ ලබා පැමිණිය ද සරසවි වරම් අහිමි වීම තරම් කුරිරු අවස්ථාවක් තවත් තිබේ ද?

කෙනෙකුගේ ජීවිතයක තීරණාත්මක කඩ ඉමක් ලෙස උසස් පෙළ විභාගය හඳුන්වා දිය හැකි ය. සමහරෙක් පළමු අවස්ථාවේ දී සාමාර්ථ මදිකම නිසා දෙවන ,තෙවන අවස්ථාවලත් උසස් පෙළ කිරීමට තීරණය කරති. එහෙත් කෙතරම් ඉහළ සාමාර්ථ තිබුණ ද සරසවියට ඇතුළු වීමේ කඩ ඉම් ලකුණු සඳහා තම ලකුණු අඩු වීම කෙතරම් අවාසනාවක් වනු ඇති ද? අවුරුදු ගණන් වෙහෙසී ඉගෙනුම ලබා අවසානයට පැමිණිය ද සිහින බොඳ කරමින් තම අධ්‍යාපන ගමන එතනින් කෙළවර කිරීමට සිදු වනුයේ සියලු අපේක්ෂා බිඳ දමමිනි.

එනිසා මේ දරු පරපුරෙහි අනාගතය අඳුරු වීමට ඉඩ නොදිය යුතු ය. මේ දරු පිරිසෙහි සරසවි සිහිනය සැබෑ කරවීමට අත හිත දිය යුතු ය. වත්මන් ආණ්ඩුව සමඟ ගැටුම් ඇති කර නොගෙන සාකච්ඡා මාර්ගයෙන් සුහදශීලි ලෙස මෙවන් අධ්‍යාපන ගැටලු සඳහා විසඳුම් ලබා ගත යුතු ය. කෙතරම් බලාපොරොත්තු සිත් තබාගෙන උසස් අධ්‍යාපනයේ හිනි පෙත්තට ම නැඟ සාර්ථක ජීවිතයක් මල් පල ගැන්වීමට සිටින මේ අහිංසක දරු පරපුර කෙරෙහි බලධාරීන්ගේ අවධානය යොමු කරවිය යුතු ය. ඒ සඳහා සාධාරණ යෝජනා ක්‍රම ඉදිරිපත් කරමින් හැකි පමණ මේ අනාගතය භාර ගැනීමට සිටින දරුවන්ට සාධාරණයක් ඉටු කළ යුතු ය. එය අප සැමගේ වගකීමක් වනවා සේ ම අනාගත අභිවෘද්ධියට ද මහඟු උපකාරයක් වනු ඇත.

"සිතට ගන්න යථාර්ථය මෙයයි කියා,,,
එකඟ වෙන්න අපහට ඉඩ නැතැයි කියා,,,
සතුටු වෙන්න ජය පැරදුම එකක් කියා,,,
සටන් කරල උත්සහ කර බලමු කියා...."

(දිනිති හසින්තා )
(කැලණිය විශ්වවිද්‍යාලය )
(2018/ 08 / 01)