එතැන් සිට තමා රැකියාවක් ලද ඒ ජයග්‍රහණය සමඟ දිනපතා සිත් බැඳි ආශාවෙන් රැකියාවට යනුයේ තම සිහින සැබෑ කරගැනීමේ සිහිනය දකිමිනි. තමා වෙහෙස මහන්සි වී දියුණුවේ මං පෙත කරා යන ඒ ගමනේ සුන්දර ම නවාතැන්පල වනුයේ තමාගේ මුල් ම වැටුප යි. මාසය අවසානයේ තම අතට හිමි වන ඒ පළමු වැටුප දෝතට ගන්නා විට දැනෙන සතුට වචනයට නැඟිය හැකිනම් කොතරම් අගනේ ද ? තම වැටුප තුළින් ඒ ලබන ආස්වාදය තමා ජීවිතයේ ලැබූ අමතක නොවන දිනයක හැඟීමක් වනු ඇත.
නමුත් වර්තමාන ලෝකය ජනප්‍රිය සංස්කෘතිය හා ගැටෙමින් ගමන් කරන නිසා අද බොහෝ දෙනෙක් තම මුල් ම වැටුප වියදම් කරනුයේ අනාගතයක් වෙනුවෙන් නම් නොවේ. ගෝලීයකරණය සමඟ අත්වැල් බැඳගත් අද තරුණ පිරිස තම පළමු වැටුපෙන් සොයනුයේ Smart Phone එකකි. එය යි අද සමාජයේ නවතම රැල්ල. මහන්සියෙන් ආහාර පිස බත් මුළක් ඔතා දී ආශිර්වාද කර තම දරුවා ව රැකියාවට පිටත් කර යවන අසරණ දෙමාපියන් ව එදිනට මතක් වනුයේ කීයෙන් කී දෙනාට ද? තම දරුවන් රැකියාව සඳහා ගොස් ජීවිතය දිනන ඒ අරමුණ ගැන හදවතින් ම සතුටු වනුයේ දෙමාපියන් පමණි. තම මුල් වැටුපෙන් දෙමාපියන් සතුටු වන යම් දෙයක් ගෙනාවේ නම් එය යි එම වැටුපේ සාධාරණත්වය. එහෙත් බොහෝ දෙනෙකුට අමතක වන කාරණය නම් එය යි.
තම දරුවන්ගේ මුල් වැටුපෙන් කිසිවක් බලාපොරොත්තු නොවුණ ද දරුවන් එම වැටුපෙන් යම් දෙයක් මිල දී ගෙන තමාට ගෙනැවිත් දුන්නේ නම් එදින දෙමාපියන්ගේ මුවඟට නැඟෙන ඒ සිනහව නම් කිසිදා මිලට ගනු නොහැකි වනු ඇත.එ නිසා තමා කොතරම් සමාජයේ ඉහළ තලයකට ගිය ද තමා හැදූ වැඩූ දෙමාපියන් ව අමතක කළේ නම් තම ජීවිතය ජය ගෙන කුමට ද ?
එ නිසා තමාගේ ජිවිතයේ ඒ ලැබූ පළමු වැටුපට සාධාරණත්වයක් ලබා දිය යුතුම ය. පළමු ව තම දෙමාපියන් වෙනුවෙන් අවම වශයෙන් ඇඳුමක්වත් ගෙනැවිත් දීම යුතුකමක් වනු ඇත. ඊට අමතර අනාගතය වෙනුවෙන් තම වැටුපෙන් යමක් කිරීම යහපත් වනු ඇත. තමා ලද ඒ මුදලින් සුළු ප්‍රමාණයක් අනාගතය වෙනුවෙන් වෙන් කළ යුතුම ය. එ නිසා බැංකු ගිණුමක් හෝ අරඹා එහි මුදල් ඉතුරු කිරීම ඔබගේ අනාගත ජීවිතයට මහඟු අස්වැසිල්ලක් වනු ඇත. එවිට කිසි දිනෙක තමාට පසුතැවීමට කාරණයක් ඉතුරු නොවනු ඇත.
එනිසා තමා මහන්සි වී හරි හම්බ කරගත් ඒ මුල් වැටුප අපතේ යා නොදී වැදගත් ,ප්‍රයෝජණවත් දෙයකට එය යොමු කිරීම වටිනේ ය. මුදල් යනු ජීවිතය ම නොවේ. එහෙත් ජීවත් වීමට නම් මුදල් අවශ්‍ය වනු ඇත. එනිසා තමාට ලැබුණ ඒ වැටුප Smart Phone එකකට ම නොදී ජීවිතයේ සමීපතම කාරණාවලට යොමු කිරීම යහපත් වනු ඇත. එ නිසා නිකරුණේ මුදල් වියදම් නොකර අනාගතය වෙනුවෙන්, තම දෙමාපියන් වෙනුවෙන් යමක් කළ යුතු ය. ජනප්‍රිය සංස්කෘතිය හා බැඳුණු පුහු දේවල් සමඟ ගැටෙමින් තම අනාගතය වෙනුවෙන් ඉදිවනඒ මාර්ගය අවහිර කර නොගෙන තම රැකියාවේ ආස්වාදය විඳිමින් ජීවිතය ගොඩ නඟා ගත යුතු ය. එ නිසා තමගේ මුල් වැටුප මෙන් ම පසුවට හිමිවන මාසික වැටුප් ද නිකරුණේ සිදී යාමට නොදී වැදගත් දෙයකට යොමු කර ,අනාගත ආයෝජනය කෙරෙහි අවධානය දෙමින්, කළමනාකාරිත්වයකින් එම මුදලට සාධාරණත්වයක් ඉටු කළ යුතු ය. එමගින් තම ජීවිතය සාර්ථක කර ගැනීමේ ඒ යහපත් ව්‍යායාමය කිසිදා අපතේ නොයනු ඇත.
( 2018 /08 /22 )
(දිනිති හසින්තා)
(කැලණිය විශ්ව විද්‍යාලය)
No comments:
Post a Comment