සංස්කෘතික මිථ්‍යාව

මව් කුසින් මෙලොවට පැමිණි අප සියලු දෙනා සිටිනුයේ එක අහසක් යට වුව,එක පොළොවක් මත වුව,ආශ්වාස කරනුයේ එක ම වායුව වුව මිනිසුන් සිතනුයේ එකිනෙකට වෙනස් ආකාරයට ය.එය නම් මානුෂීය ස්වභාවය යි.අප සැමගේ රුධිරය එක ම පැහැය වුව මිනිසුන් සමාජය තුළ ජාති,ආගම් ලෙස බෙදී වෙන් වී ගොස් ඇත.හැඩයෙන්,පැහැයෙන් ,ශරීර අංගයන්ගෙන් එකිනෙකා වෙනස් වුව ද අප සැම එක ම මනුෂ්‍ය වර්ගයකි.නමුදු අතීතයේ සිට ම මිනිසා සංස්කෘතිය හා යමින් කොටස් වශයෙන් බෙදී සිටී.සොබාදහමින් කළ බෙදීමක් නො ව මෙය නම් මිනිසාගේ සංස්කෘතික බෙදා ගැනීමකි.

" සංස්කෘතිය යනු මිනිසා විසින් ඉගෙන ගෙන, එක් රැස් කර ගන්නා වූත්, බෙදා හදාගෙන පරම්පරාවෙන් පරම්පරාවට ගෙන යනු ලබන අදහස්, උදහස් හා හුරුපුරුදු ය" මේ 1936 රැල්ෆ් ලින්ටන්ගේ විග්‍රහය යි.සංස්කෘතිය හා මිනිසා අතර පවතින්නේ අවියෝජනීය බැඳීමක් නිසා එයින් ගළවා ගැනීම පහසු නැත.සංස්කෘතිය හරහා අප කන බොන දෑ සිට අඳින, පළඳින ,ගමන් බිමන්,හැසිරීම ,කතා කරන විධි ආදී සියල්ල ගොඩ නඟා හමාර ය.එම සංස්කෘතියෙන් බැහැර ව හැසිරෙන්නේ නම් සමාජයේ හිමිවන පහත් තත්ත්වය ඔබ වුව අත් විඳ තිබිය හැකි ය.

මේ අතර කාන්තාව හා සංස්කෘතිය යන සංකල්පය අද බොහෝ දෙනා අතර අතීතයේ සිට ම කතාබහට ලක් වේ. සංස්කෘතිය හරහා කාන්තාව සීමාසහිත වපසරියකට කේන්ද්‍ර ගත කොටතිබෙනු දැක ගත හැකි ය. කාන්තාව යනු සංවර ව සිටිය යුතු, ඝෝෂාකාරී ව කතා නොකළ යුතු ,ගෙදර දොර වැඩ කටයුතු කළ යුතු කළ යුතු යැයි සමාජය තීරණය කර තිබීම කණගාටුවට කරුණකි. ඒ ආකාරයට බොහෝ දුක් ගැහට විඳීමට සිදු වන ඇයව සංස්කෘතිය යන යදම්වලින් බැඳ සමාජ ස්ථරය තුළ කොටු කර ඇත. මේවා සොබාදහම තීරණය කළ දේවල් නො ව මිනිසා ගොඩනඟා ගත් පුහු ආටෝපයන් ය.

කාන්තාවට ආර්ථිකය අතින් ශක්තිමත් වීම සඳහා රැකියාවක නියුතු වීම සමාජය එතරම් පිළි නොගන්නා දෙයකි. හේතුව ඇය නිවසේ වැඩ කටයුතු බලා ගැනීමට සිටිය යුතු නිසා ය. එ ය ඉතා ම අසාධාරණයකි. සංවර්ධනය වන රටකට එවන් දෑ විශාල බාධාවක් වුව ද සංස්කෘතියේ එල්බ සිටින මිනිසා එය වෙනස් කිරීමට සූදානම් නොවේ.තව ද කාන්තාවට සිදුවන අසාධාරණකම් ලෙස ඇතැම් සංස්කෘතික සමාජවල ගැහැණු දරුවන් ඉපදීම අවාසනාවකැයි සිතා ළදරු වියේදී ම ඔවුන් ව මරා දමන බව දැක ගත හැකි ය.තවත් ආගම්වල කාන්තාවන්ට සමාජයේ හිමි ස්ථානය ඉතා පහත් කොට ඇත.එ නිසා ඔවුන්ට තම ස්වාධීන තීරණ ගැනීමේ බලය අහිමි කොට ඇත.

තව ද සංස්කෘතිය හරහා ගොඩනගා ඇති කාන්තාවගේ විවාහය හා සම්බන්ධ දෑ කතාබහට ලක් විය යුතුම ය.විවාහයේ දී කන්තාවගේ කන්‍යා භාවය යන්න සංස්කෘතික වශයෙන් පිළිගන්නා අත්‍යන්ත අවශ්‍යතාවයකි. එහිදී විවාහයට පෙර කාන්තාව ලිංගික සබඳතා පැවැත්වීම තහනම් කොට ඇති නිසා විවහයට කන්‍යා හාවය බිඳී යැයි ඔප්පු වුවහොත් ඇයට ව්ඳීමට සිදුවන අපහාස, අවලාද එමට වනු ඇත. නමුදු පිරිමි පාර්ශ්වය විවාහයට පෙර ලිංගික සබඳතා පවත්වාඇතිදැයි තීරණය කිරීමට සාධක නොමැති නිසා ඔවුන්ට එවන් තහනමක් නොමැති නම් කාන්තාවට පමණක් සිදු කරන මේ අසාධාරණය කුමක්ද?

මෙතරම් විද්‍යාව, තාක්ෂණය දියුණු ලෝකයක තවමත් සංස්කෘතිය හරහා කාන්තාව අපහසුතාවයට පත් කරයි නම් ඒ ලබන දියුණුවෙන් කිනම් ඵලයක් ද? එනිසා සංස්කෘතික බෙදීම් ඉවතලා ජාතියක් වශයෙන් ඉදිරියට යාමට කාන්තාව ශක්තිමත් කළ යුතු ය. ශ්‍රි වාදය යන්න තහවුරු කොට කාන්තාව මේ සංස්කෘතික අසාධාරණකම්වලින් බේරා ගත යුතු ය. සමාජය තුළ සංස්කෘතියක් තිබිය යුතු ය. නමුදු හුදු මිථ්‍යාවන් රැසක් තුළින් කාන්තා පාර්ශ්වය ශාරීරික ,මානසික පීඩාවට පත් කිරීම යුක්ති සහගත නොවනු ඇත.

ඒ ආකාරයට මේ සංස්කෘතික බෙදීම නිසා වර්තමාන සමාජය ගැටුම් බොහොමයකට හේතු වී ඇත.කෙසේ හෝ මේ බෙදීම් දුරලමින් සංස්කෘතිය ආරක්ෂා කර ගනිමින් සමාජය තුළ ඉදිරියට යාමට කටයුතු කළ යුතු ය.නැතහොත් සංවර්ධනය කරා යන මේ ගමනට බාධා පැමිණෙනු ඇත.ඒ නිසා සංස්කෘතික ලැග්ම තුළ ම එල්බී නොසිට රටේ අනාගතය වෙනුවෙන් එකාවන් ව වැඩ කළ යුතු ය.එය යි අනාගතය වෙනුවෙන් අප සැමගේ වගකීම.

( දිනිති හසින්තා )
(2018/ 08/ 24)
(කැලණිය විශ්ව විද්‍යාලය )