❤ ❤️දිවි හිමියෙන් රකිමි මගේ අම්මා ❤️❤️

වාඩි වීගෙන

ඔඩොක්කුව උඩ

නින්ද යනකම්

නෙතු මගේ

නැලෙව්වේ මා

නුඹයි අම්මේ

සදා මතකයි

මට මගේ

දුවන විට මා

ගේ පුරා තුළ

සොයනවා නුඹ

රුව මගේ

නොමැති විට මා

පෙනෙන මානෙක

තෙමෙයි කඳුළින් 

නෙත ඔබේ

සමාවනු මැන

රිදුම් වුණි නම්

මා නිසා

නුඹෙ හදවතේ

කරනු ඇති මා

කෙළෙහි ගුණ නම්

සදා අමතක

නොවේ අම්මේ.....

(පද රචනය - දිනිති හසින්තා)

(2018/06/28)

සොබාදහමට ආදරය කරන ඔබ වෙනුවෙන්,,,

අප අවට ඇති මේ සියල්ල අපගේ නොව සොබාදම් මාතාවගේ නිර්මාණයන් ය.මේ සියල්ල හැඩ ගැන්වීමේ ලා මනුෂ්‍ය ප්‍රජාව මූලික වුව ද සොබාදහමට විරැද්ධ ව යාම ලෝක විනාශයට පාර කියන්නක් බව අමුතුවෙන් කිව යුතු නැත.අප මේ දකින අහස,අපි මේ සිටින පොළොව,මේ හමන සුළඟ,මේ ගන්න හුස්ම ආදී  සියල්ල සොබා දහම සමඟ බැඳුණු නිර්මාණයන් ය.ආදි මිනිසා සොබා දහමට දේවත්වයේ ලා සළකා තිබෙන්නේ එහෙයිනි.ගස්,ගල්,ඉර,වැස්ස ආදියට දෙවියන් සේ සළකමින් ඒවාට ඔවුන් පුද සත්කාර කළේ ඒවාට කළ ගුණ දැක්වීමේ අරමුණෙ නි.
එකල මිනිසාගේ නිවහන වූයේ වනාන්තරය යි.වනයේ පල වැල ආහාරයට ගනිමින් ඔවුන් වන සතුන්ට ආදරය කරමින් රිසි සේ කල් ගත කළහ.ඔවුන්ට සියලුම අවශ්‍යතා සපුරා ගැනීමට වනාන්තරයේ සම්පත් ප්‍රමාණවත් විය.එකල මානවයා පරිසරයට මෙතරම් සමීප වූයේ ඔවුන්ගේ ජීවිතයේ පැවැත්ම රඳා පවතිනුයේ සොබා දහම නිසා බව ඔවුන් දන්නා නිසාම ය.

සොබා දහමේ අනාගතය රඳා පවතින එක් ප්‍රධාන සාධකයක් ලෙස වනාන්තර හඳුන්වා දිය හැකි ය.වනාන්තර යන්නෙන් ගත් විට ම අපට හැඟෙනුයේ තුරුලතාවලින් ගහණ වූ පරිසරයක් ලෙස ය.නමුදු ඊට එහා ගිය අරුතක් සහිතව හඳුන්වා දීමක් ඊට ලබා දීම වටිනේ ය.ඒ අනුව,

"තුරුලතාවලින් හැඩ ගැන්වුණු, සතා සිපාවගේ හඬ එක්වුණු ,සිසිල් මද පවන් පහස ලැබෙන, හිරු කිරණින් ආලෝකමත් වුණු, දිය ඇළි ගංඟාවලින් චමත්කාර වුණු, විකසිත කුසුම්වලින් සුවඳවත් වුණු ඔබේත් මගේත් ජීවනාලියක උරුමය - වනාන්තරයි."

සොබාදහමට නැතුව ම බැරි අංගයක් වූ මේ වනාන්තර හරහා ලොවට සළසන මෙහෙය අති මහත් බව කිව යුතුම ය.සොබා දහමේ අපූර්වතම නිර්මාණයක් වූ මේ වන සම්පත මනුෂ්‍ය ප්‍රජාවගේ මෙන් ම සත්ත්ව සංහතියේ ම ප්‍රාණය සුරැකීමට ඉවහල් වේ.අප පිට කරන කාබන්ඩයොක්සයිඩ් වායුව උරා ගනිමින් අපට ආශ්වාස කිරීමට සුපිරිසිදු ඔක්සිජන් වායුව ලබා දෙනුයේ අන් කවරෙකුත් නො ව තුරු ලතාවන් ය.මේ සියල්ල සිදු වනුයේ සොබා දම් මාතාවගේ අනු දැනුමෙනි.

නමුත් මොහොතක් සිතා බැලිය යුතු කරුණක් පවතී.එනම් මිනිසාට මෙතරම් උපකාර කරන සොබාදහමට මිනිසා කළ ගුණ දක්වන අයුරු සාධාරණ ද? කිසිසේත් නැත.අද සමාජයේ ජීවත් වන කෲර මිනිසා සොබාදහම පිළිබඳව කිසිදු තැකීමක් නොකොට එය විනාශ කරමින් සිදු කරනුයේ අහස පොළොව නුහුලන අපරාධයකි.අයෙක් ගහ කොළ කපා ඒවා අලෙවි කරමින් මුදල් උපයති.අයෙක් වන විනාශ කරමින් ගොඩනැගිලි නිර්මාණය කරති.අයෙක් සංවර්ධනය උදෙසා අවශ්‍ය මහා මාර්ග, කර්මාන්ත ශාලා ඉදි කිරීමට වනාන්තර එළි පෙහෙළි කරති.මේ සියල්ල පෘථිවි අභ්‍යන්තරයේ සිදුවන විනාශය න් ය.මේවාට වග කිව යුත්තේ අන් කිසිවෙක් නො ව මනුෂ්‍ය වර්ගයා ය.තම උවමනාවන් පමණක් සාක්ෂාත් කර ගනිමින් ආත්මාර්ථකාමී ලෙස සොබා දහම විනාශ කිරීම මහත් පාප කර්මයකි.මෙවන් විනාශයන් සිදු කිරීමෙන් අනාගතයේ අපිට කාන්තාර භූමියක් පමණක් ඉතුරු වනු ඇත.සොබාදහමට සිදු කරන මේ අපරාධයන්ට කෙදිනක හෝ දඬුවම් විඳීමට ම සිදු වනු ඇත.

එනිසා අප සොබා දහම සමඟ ගණු දෙනු කළ යුත්තේ ඉතා ප්‍රවේශමෙනි .තිරසාර සංවර්දනයෙලා කියවෙන ආකාරයට,

"වර්තමානයේ අප සම්පත් පරිභෝජනය කළ යුත්තේ අනාගත පරම්පරාවේ සම්පත් පරිභෝජනයට බාධාවක් නොවන ආකාරයට ය."

ඒ ආකාරයට සම්පත් පරිභෝජනය කරන්නේ නම් අපට අනාගතය පිළිබඳ ව කිසි සේත් බිය විය යුතු නැත.එනිසා සොබාදහම අපගේ මිතුරෙකු කොට ගත යුතු ය.ඊට ආදරය කළ යුතු ය.එක් ගසක් කැපුවහොත් ඊට සරිලන ලෙස ගස් සියයක් සිටුවිය යුතු ය යන කියමන සිහි තබා ගත යුතු ය.සොබාදහම විනාශ වූ පරිසරයක අපිට කිසිසේත් ජීවත් විය නොහැකි සේ ම සොබාදහමකින් තොර ලෝකයක් පිළිබඳ ව සිතීමටවත් නොහැකි ය.එනිසා සොබාදහමට අනුකූලව ජිවත් වීමට අප කුඩා කළ සිට ම පුරුදු පුහුණු විය යුතුය.ඊට සැමදා ගරු කළ යුතු ය.එවිට සොබාදහම කිසිදා අපගෙන් ඈත් වී නොයනු ඇත.

(2018/06/23)
(දිනිති හසින්තා)

යශෝධරාවගේ ඉකිබිඳුම....

මා දනී නුඹ හැර ගියේ අප,,,
කෙසේවත් සිතකින් නොවේ,,,
නමුදු සත්‍යයයි නුඹේ පිටවුම,,,
සසර කතරින් එතෙර වීමයි...

හඬන්නට ඇති නුඹේ හදවත,,,
එදින නම් ඒ විරහවෙන්,,,
නමුදු මේ සැම දරාගෙන නුඹ,,,
හැර ගියා හද ශෝකයෙන්...

බිළිඳු කුමරුන් හඬනවා දැන්,,,
පියාණන් සිහි වෙලාවත්දෝ,,,
දැනෙන්නේ රාහුල කුමරුටත් අද,,,
පියාණන් නැති අඩුවදෝ...

ඉවතලූවා රස බොජුන් මම,,,
ඉවතලූවා රන් අබරණ,,,
ඉවතලූවා සියළු කම් සැප,,,
විඳින්නෙමි දැන් ඔබේ ම ලෝකය...

පතන්නේ මා එකම පැතුමයි,,,
ඉෂ්ට වේවා නුඹේ අරමුණ,,,
ලෝක සත්ගේ දුක් නිවීමට,,,
ලැබේවා මඟ නිවන් දැක්මට...

නොවේවා මේ කඳුළු ශාපයක්,,,
වේවා සුබාශිංසනයක්!!!!

(2018/06/19)
(දිනිති හසින්තා)

සැබෑ අවසානය.

කුසුම් මුකුලිත වී යාවි,

තුරු ගොමු වියළී යාවි,

දිය උල්පත් සිඳී යාවි,

සත්ත්වයින් නැසී යාවි,

අහස ගුගුරා,

පොළොව දෙදරා,

ලෝකය විනාශ වේවි,

සියල්ල කෙළවර වේවි...

(2018/06/16)

(දිනිති හසින්තා)

❤️❤️හිරු මඬලක් වූවා නම් නුඹ❤️❤️

උදා ළා හිරු රැස් පතිත වී,,,

ලොවම නහවමින්,,,

නැඟෙනා හිරු මඬල,,,

ලෝකයක් අවදි කරවයි.

කෙමෙන් කෙමෙන් ඒ හිරු මඬල,,,

ලෝකය අඳුරු කරමින්,,,

බැස ගියද,,,

හිරුගේ ප්‍රාර්ථනය,,,

උදා වෙන අලුත් දිනට,,,

නැවත සපැමිණීම ය.

හිරු මඬල නම් එසේම ය නිති,,,

නමුදු

මා හද ගැබට පෑයූ නුඹ,,,

නොවනු ඇති කිසිදා හිරු මඬලක්..

කිම ද,,,

හිරු මඬලක් වූවා නම් නුඹ,,,

පායනු ඇති නැවත,,,

මා හද ගැබට...

නමුදු,,,

හිරු මඬලක් සේ බැස ගිය නුඹ,,,

පායනු නොමැත කිසිදා,,,

මා හද තුළට...

(2018/06/15)

(දිනිති හසින්තා)

☘☘චූටි හාමුදුරුවෝ☘☘

අපි එදා පන්සල් යනකොට,,,

චූටි හාමුදුරුවො,,,

පාඩම් කරන ගමන්...

මොනවද කියල ඇහුවම,,,

ලොකු හාමුදුරුවො ගාථාවක්

පාඩම් කරන්න කිව්වලු...

චූටි හාමුදුරුවන්ගෙ අම්මා,තාත්තා නෑලු,,,

ලොකු හාමුදුරුවො විතරලු ඉන්නෙ...

ලොකු හාමුදුරුවො සැරයිලු,,,

ඒත් හරි හොඳයිලු...

සිවුර ඇඳන් ඉන්න අමාරුයිලු,,,

මොකද,,,

චූටි හාමුදුරුවො තව පොඩියිලු...

චූටි හාමුදුරුවො නම් රෑට වළඳනවලු,,,

නැත්තම් චූටි හාමුදුරුවන්ට බඩගිනිලු...

සෙල්ලම් කරන්න යන්නම හිතලු,,,

ඒත් චූටි හාමුදුරුවන්ට,,,

ඒවා අකැපයිලු...

චූටි හාමුදුරුවො අපේ ගෙදර වඩින්න කිව්වම,,

බෑ ලු,,,

ලොකු හාමුදුරුවො පවු ලු...

(දුක හිතුණා ඒකටනම්,,,

මොකද ගොඩක් පොඩියි චූටි හාමුදුරුවො...

චූටි හාමුදුරුවෝ සසර එතෙර වෙයි,,,

ඒත් මේ අපි????

සංසාර ගමනේ තව තවත් දුක් විඳියි,,,

එය යි සැබෑ යථාර්ථය,,,

අපි තේරුම් නොගත්)

(2018/06/11)

(දිනිති හසින්තා)

❤️❤️මගේ ලොවේ වීරයා නුඹයි තාත්තේ❤️❤️

මා උපන් දිනයේ,,,

සඟවා සතුටු කඳුළු,,,

හැඬුවේ නුඹයි,,,

රහසේ...

සියළු බර කර දරා,,,

නොදී වීමට කිසිදු අඩුවක්,,,

රැකුවේ නුඹයි,,,

පණ සේ...

පෑයූ සඳ මෙන්,,,

මගේ ලොවට,,,

එළිය දුන්නේ නුඹයි,,,

එලෙසේ...

නැමඳ ඔබ දෙපා,,,

රකිමි පණ සේ,,,

සදා වීරයා නුඹයි,,,

තාත්තේ මගේ...

(2018.06.09)
(දිනිති හසින්තා)

💖🌹🌼අහිමි සෙනෙහසක හදවත ස්පර්ශ කරන ප්‍රාර්ථනය🌹🌸💖

සසරේ පතා ආ ලෙස අපි හමුවුව,,,
පින් මදි ඇති අපි අපේම වීමට,,,
නමුදු සැමදා ආදරෙයි මම,,,
සිටිනු සතුටින් දුක් ඉවසාගෙන....

එක්වන පැතුමන් බිඳ හැර,,,
අහස පොළොව වැළපෙන සඳ,,,
මට නුඹ එතරම් දුර බව,,,
නොදැනෙන ලෙස සිනහ වෙන්න....

යොදුන් ගණන් පියවර මැන,,,
ගවුවක ඈතින් නැවතුණ,,,
ප්‍රාර්ථනා කඳු මුදුනට,,,
අත වනලා සුබ පතන්න....

කඳුළු බිඳක පහස සොයන,,,
අහිමි හැඟුම වසා අතින,,,
සිනහ බිඳක් මට වෙන් කර,,,
සමු ගන්නම් මට අවසර....

(2018/06/08)
(දිනිති හසින්තා)

❤️❤️සිහින ලොවෙන් ❤️❤️මගේ හිතට නුඹ වඩින්න❤️❤️

සිනා දෙතොල පිය වී යන,,,
සිහින මවන සිතුවිල්ලක,,,
සිහින් සරින් පියවර මැන,,,
හද කුටියට නුඹ වඩින්න,,,
මගෙ හිත සුවපත් කරන්න...

දහසක් දන යන එන තැන,,,
සහසක් සිතුවිලි මුමුණන,,,
නෙත් හී සර මිහිර රැගෙන,,,
හීන් සැරේ මට විඳින්න,,,
හිතට හොරා නුඹ වඩින්න...

දෑත දෑත පටලාගෙන,,,
දෑස දෑස මඟ නොමහැර,,,
කිසිම දිනෙක මිදෙනු නොහෙන,,,
බැඳීමකින් මා වෙලන්න,,,
මගේ හිතට නුඹ වඩින්න...

(2018/06/07)
(දිනිති හසින්තා)

💖💖ඇගේ රුවට පෙම් බැඳි මා,,,💖💖

දුහුල් මිහිඳුම් සළුව අතරින් පෙනුණු නුඹේ රුව,,,
අඳුරු සෙවණැලි ගොමුව අතරින් ගිලිහුණු නුඹේ රුව,,,
මා සිත සසල කළ අපූරුව දන්නේ මා පමණකි...

ඒ මුදු කුසුම නෙලා ගැන්මට,,,
වරම් අහිමි වුව,,,
රැඳෙමි මතකයේ නිති,,,
පතා ඒ රුව පමණක්,,,
සදාකාලයට....

(2018/06/06)
(දිනිති හසින්තා)

💖මිතුදමක සොඳුරු ප්‍රාර්ථනය💖

එකම දෙරණක අහස යට හිඳ,,,
පැතුවමුත් ජය අනාගතයට,,,
සිහින ගුගුරා නැගෙන්නේ තව,,,
ගෙවීගෙන යන කාලයයි...
කට කොනින් එන සිනහ අතරට,,,
කඳුළු බිඳුවල පහස විඳගෙන,,,
පොළොව දෙදරා වෙර දරන්නේ,,,
ජීවිතේ බර කියාදෙන්නයි....

සසර කොතැනක සිටියමුත් අප,,,
මිතුරුකම් ගෙන හදවතින් හෙට,,,
දිවියෙ හමුවන සොඳුරු කවියක,,,
පද දෙකක්වත් ලියන්නයි...
ලොවම උහුලන මේ පැතුම් හෙට,,,
පදින ඔරුවක හබල සිපගෙන,,,
ලොවම කම්පා නොවී නුඹල හට,,,
යන්න පාරක් හැදෙන්නයි....

(2018/06/05)
(දිනිති හසින්තා)

❤️❤️විලාසිතාවකට සම කළ නොහැකි ආභරණය - සිනහව..❤️❤️

විටෙක අරුතක් ඇති,
විටෙක අරුතක් නැති,
අරුත් දහසක නැවතුමකි,,,,
සුන්දර සිනහව...
අයෙක් හදවතින් ම සිනාසෙයි,
අයෙක් කවටකම ට සිනාසෙයි,
අයෙක් දැනුවත් ව සිනාසෙයි,
අයෙක් නොදැනුවත් ව ම සිනාසෙයි,
එය යි මිනිසාට උරුම නොමිලේ දිය හැකි,
එකම වටිනා වස්තුව...

 සිනහවකට පුළුවන් දහසක් හිත් සනසන්න.
සිනහවකට පුළුවන් අයෙක්ට ආදරය දෙන්න.
සිනහවකට පුළුවන් හිතක් කියවන්න.
සිනහවකට පුළුවන් මනුස්සකම පතුරන්න.
එනිසා පතුරුවන්න සිනහව හදවතට එකඟ ව
එයයි ලොව සදාදරණීය පැතුම...

එහෙයින්,,,,
නොදෙනු වියැකී යන්න සිනහව,
රඳනු සැමවිට මුවඟ
සිනහව,
සැමට හිමි වූ සොඳුරු මදහස,
පානු මැන නිති නොවී ලෝබ ව.....

(2018/06/04)
(දිනිති හසින්තා)

⌚️⌚️අරුමයකි කාලය කිසිදා නොවෙනස්වන⌚️⌚️

කිසිවෙකුට නවතනු බැරි,,,
රන් හා සම කරන,,,
අරුම පුදුම මායාවකි,,,
කාලය...

අයෙක් ප්‍රිය කරන,,,
අයෙක් වෛර කරන,,,
සොබාදම් මායාවකි,,,
කාලය...

තප්පරයෙන් තප්පරය,,,
මිනිත්තුවෙන් මිනිත්තුව,,,
පැයෙන් පැය,,,
දවසින් දවස,,,
ගෙවෙයි ඔබේත් මගේත්,,,
වටිනා කාලය...

නැවත ගනු බැරි,
ගිය ද නවතනු බැරි,
යැවිය නොහැකි,
නොවෙනස් ව න සත්‍යයකි - කාලය

(දිනිති හසින්තා)
(2018/06/03)

හුස්ම පොදට පවා දිනෙක වෛර කරන - මරණය

ලොව ඇති සනාතන ධර්මතාවකි,,,
සැමට පොදු මරණය...
කෙලෙස, කොයි විටෙක, කුමන ආකාරයට මාරයා පැමිණේදැයි,
කිව නොහැක අපට....

නමුදු
මලක් නම් පර වෙනවාම ය,
ගසක් නම් දිරනවාම ය,
ආහාර නම් පිළුණු වෙනවාම ය,
හිරු සඳු බැස යනවාම ය,
කළ පින් පව් පල දෙනවාම ය,
ආයුෂ නම් අඩු වෙනවාම ය,
එලෙසින්,
මරණය සිදු වෙනවාම ය....

එ නිසා,
මානය, තණ්හාව, වෛරය,
කුමට ???
තබා යනු හොඳ නාමය,සැම සිත් සතන් තුළ,
සදාකාලයට.....

(දිනිති හසින්තා)
(2018/06/02)